A Área Sanitaria de Pontevedra e O Salnés elevou a 296 os falecementos de persoas con positivo activo por coronavirus desde o inicio da pandemia, ao sumar este luns o Servizo Galego de Saúde unha nova vítima ás súas estatísticas.

Trátase dun home, de 82 anos de idade.

Na primeira actualización oficial de datos da semana o Sergas engade o citado falecemento e tamén reflicte un aumento nas hospitalizacións, que supoñen 12 máis que as que se sinalaban o pasado sábado.

Así, a luns 13 de xuño, son 54 as persoas infectadas con covid que permanecen ingresadas nos hospitais da comarca.

Delas 5 evolucionan na Unidade de Coidados Intensivos de Montecelo e o resto fano en planta repartidos entre o Complexo Hospitalario Universitario de Pontevedra (39), o Hospital do Salnés (8) e o Hospital QuirónSalud Miguel Domínguez de Pontevedra (2).

Segundo as cifras oficiais o Servizo Galego de Saúde mantén actualmente vixilancia sobre 951 casos activos de covid en Pontevedra e O Salnés.